«2008- ռուս-վրացական պատերազմի ժամանակ Ջավախքի հայերը միավորվեցին վրացիների հետ եւ օգնեցին դիմագրավել ռուսական զորքերի գրոհներին»,- այս մասին Երեւանում կայացած ասուլիսում հայտարարել է Վրաստանի Կրթության եւ գիտության նախարար Ալեքսանդր Շաշկինը:
Անդրադառնալով կրթական խնդիրներին, նա նշել է, որ Ջավախքի հայկական դպրոցներում հայերենի դասաժամերի կրճատումը ժամանակավոր երեւույթ է: Նա խոստացել է, որ արդեն 2012-ին հայկական դասաժամերի քանակը կավելանա Ջավախքի հայկական դպրոցներում, սակայն դրան զուգահեռ կավելանան նաեւ վրացերենի դասաժամերը:
Ինչ վերաբերում է դասագրքերին, ապա դրանք պետք է վրացերենից թարգմանվեն հայերեն, հետո ուղարկվեն Հայաստան ստուգման, այնուհետեւ կրկին վերադառնան Ջավախք: Իսկ հայոց լեզվի դասագրքերը Ջավախքի դպրոցների համար կստացվեն ուղիղ Հայաստանից:
Իսկ հայոց լեզվի ուսուցիչների համար իսկապես, լավ որոշում է կայացվել. Հաջորդ տարի նրանք վերապատրաստման համար կմեկնեն Քոբուլեթի: Վրաստանի կրթության նախարարը հերքել է նաեւ տեղեկությունները, թե Ջավախքի դպրոցներն անվանափոխվում են:
Նշենք, որ այսօր Հայաստանի եւ Վրաստանի ԿԳ նախարարներ Արմեն Աշոտյանն ու Ալեքսանդր Շաշկինը համագործակցության հուշագիր են ստորագրել, որը նախատեսում է Հայաստանի կողմից աջակցություն Վրաստանի հայկական դպրոցներին եւ Վրաստանի կողմից աջակցություն Հայաստանում վրացագիտական կենտրոններին: Բացի այդ, վրացի նախարարի այցելության շրջանակներում վրացերենի ամբիոն է բացվել Երեւանի Վ. Բրյուսովի անվան լեզվաբանական համալսարանում: Այդտեղ վրացերեն կուսանեն Ջավախքից պետպատվերով Հայաստանում սովորող ուսանողները:
Նշենք, որ Վրաստանի ԿԳ նախարարության պատվիրակությունը այցելել է Ծիծեռնակաբերդի հուշահամալիր եւ ծաղիկ դրել Հայոց ցեղասպանության զոհերի հիշատակին:
