Վրաստանի ոստիկանությունը ձերբակալել է երկրի խորհրդարանի նախկին փոխխոսնակ Զուրաբ Սուրմանիձեին: Ինչպես հաղորդում են վրացական լրատվամիջոցները` հղում անելով Վրաստանի ՆԳՆ-ին, Սուրմանիձեն եւ նրա երկու հանցակիցները մեղադրվում են գերմանացի ներդրողին առեւանգելու եւ նրա ազատման դիմաց փող պահանջելու մեջ:
Հետաքննության տվյալներով, Գեորգի Բերուլավան եւ Մուրտազ Մեուրմիշվիլին մի քանի օր անազատության մեջ են պահել գերմանացի մի ներդրողի, նրան ազատելու դիմաց պահանջելով 270 հազար դոլար:
Ինվեստորի վկայությամբ, առեւանգողներն իր նկատմամբ ֆիզիկական ճնշում են գործադրել, այդ թվում նաեւ խորհրդարանի նախկին փոխխոսնակը, ով չէր համաձայնում ստանալ գումարի միայն մի մասը` 100 հազար դոլար:
Փաստի առթիվ քննություն է ընթանում եւ եթե ձերբակալվածներին առաջադրված մեղադրանքը հաստատվի, նրանց սպառնում է մինչեւ 10 տարվա ազատազրկում:
Նշենք, որ Սուրմանիձեն խորհրդարան էր անցել Ալսան Աբաշիձեի կուսակցությունից, այնուհետեւ դարձել նախկին վարչապետ Զուրաբ Ժվանիայի թիմի անդամ:
