«Զինված խմբի» գործով մեղադրյալ, պաշտպանության նախկին փոխնախարար Վահան Շիրխանյանի մեղադրանքը խստացվել է: Այս մասին NEWS.am-ի հետ զրույցում ասաց նրա պաշտպան Հայկ Ալումյանը:
«Նոր հոդված է ավելացվել: Նա մեղադրվում է նաեւ իշխանության յուրացում նախապատրաստելու մեջ»,- ասաց պաշտպանը՝ նշելով, որ մեղադրանքը ծանրացնելու ոչ մի հիմք իրենց չի ներկայացվել:
Վահան Շիրխանյանը կալանավորվել է 2015թ. դեկտեմբերի 21-ին «զինված խմբի» գործով։ Նա մեղադրվում է խմբի պարագլուխ հանդիսացող Արթուր Վարդանյանի հետ հանցավոր համագործակցության մեջ, կոնկրետ հանձնառություն եւ դերակատարություն ունենալու մեջ: Անազատության մեջ գտնվելով՝ Վահան Շիրխանյանը ոտքից վիրահատվել է, առողջական խնդիրներ ունի: