Լատվիայի համար ռազմավարական առաջնայնություններից մեկը մնում է Եվրոպայում արեւելյան հարեւանների կայունությունն ու անվտանգությունը։ Մերձդնեստրում, Աբխազիայում, Հարավային Օսիայում եւ Լեռնային Ղարաբաղում հակամարտությունների կարգավորումը պետք է կարեւոր տեղ զբաղեցնի միջազգային օրակարգում։ Այս մասին ՄԱԿ Գլխավոր Ասամբլեայի 71-րդ նստաշրջանում ելույթ ունենալիս ասել է Լատվիայի նախագահ Ռայմոնդս Վեյոնիսը, փոխանցում է ՄԱԿ պաշտոնական կայքը։
Նա նշել է, որ բոլոր երկրները, այդ թվում՝ Ռուսաստանը, պետք է կատարեն միջազգային իրավունքի շրջանակներում ստանձնած իրենց պարտավորությունները եւ հարգեն անկախ պետությունների սահմանները։
«Լատվիան միջազգային հանրության հետ մեկտեղ նախկինի պես կպաշտպանի Ուկրաինայի ինքնիշխանությունն ու տարածքային ամբողջականությունը։ Մենք չենք ճանաչում Ղրիմի անեքսիան։ Դրան պետք է վերջ տրվի»,– ասել է Վեյոնիս Ռայմոնդսը։
Նախագահն ընդգծել է, որ միջազգային հանրությունը պետք է նպաստի Ուկրաինայի հակամարտության խաղաղ կարգավորմանը, իսկ կողմերը պետք է պահպանեն Մինսկի համաձայնագրերը։
Վեյոնիս Ռայմոնդսը նաեւ նշել է, որ Լատվիան աջակցում է Ուկրաինային բարեփոխումների հարցում եւ հումանիտար օգնություն է մատակարարում։