«Սասնա ծռեր» խմբի անդամ Արայիկ Խանդոյանը եւս երկու ամիս կմնա կալանքի տակ: Նման որոշում է կայացրել Երեւանի Արաբկիր եւ Քանաքեռ- Զեյթուն վարչական շրջանների ընդհանուր իրավասության դատարանը` բավարարելով քննիչի միջնորդությունը:
«Դատարանը մերժեց մեր միջնորդությունը` գրավի դիմաց ազատ արձակելու Խանդոյանին: Դատարանը վճիռը հրապարակեց առանց մեր ներկայության, նույնիսկ քննիչը չկար: Ես հայտարարեցի, որ դատարանն արդարադատություն չի իրկանացնում, այլ նոտարի դեր է կատարում. կնիք է դնում միայն»,- վճռի հրապարակումից հետո լրագրողներիհետ զրույցում ասաց Խանդոյանի պաշտպաններից Արա Ղարագյոզյանը:
Նշենք, որ Խանդոյանի սատարելու համար դատարանի դիմաց էին հավաքվել նրա ընտանիքի անդամներն ու համակիրները, որոնք բացականչություններով և վանկարկումներով ճանապարհեցին նրան:
Հիշեցնենք, որ Արայիկ Խանդոյանին մեղադրանք է Քրեական օրենսգրքի 218 հոդվածի 3-րդ մասի 1-ին կետով (պատանդ վերցնելը) եւ 235 հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել):
