Մայիսի 31-ից կալանքի տակ գտնվող, Ժիրայր Սեֆիլյանի հետ համագործակցությամբ ապօրինի զենք, զինամթերք պահելու մեջ մեղադրվող Ներսես Պողոսյանի մայրը վստահ է` գործը սարքված է: Ըստ Պողոսյանի մոր` տիկին Սաթիկի, իր որդին որեւէ կապ չունի Ժիրայր Սեֆիլյանի եւ«Հիմնադիր խորհրդարանի» հետ:
«Այս գործն ամբողջությամբ սարքված է, իմ տղան ընդամենը ցույցերի է գնացել, բայց «Հիմնադիր խորհրդարանի» հետ որեւէ կապ չունի, Սեֆիլյանի հետ ոչ մի կապ չի ունեցել: Ներսեսս շինարարությունում է աշխատում, սեզոնային գործ է անում》,- NEWS.am-ի թղթակցի հետ զրույցում ասաց տիկին Սաթիկը:
Ներսես Պողոսյանը, մոր խոսքով, Սեֆիլյանի դեմ ոչ մի ցուցմունք չի տվել, ավելին ապօրինի զենք զինամթերք չի պահել:
Նշենք, որ Ներսես Պողոսյանն ամուսնացած է, երեք անչափահաս երեխա ունի:
Հիշեցնենք, որ Ներսես Պողոսյանը կալանավորվել է 2016թ. մայիսի 31-ին: Նրան մեղադրում են Քրեական օրենսգրքի 235 հոդվածի 2-րդ մասով` Ժիրայր Սեֆիլյանի հետ համագործակցության արդյունքում ապօրինի զենք եւ զինամթերք պահելու մեջ: