Պետք է ուսումնասիրել, թե որոնք են մեր թիրախային կետերը, որ ոլորտները մենք կարող ենք զարգացնել, որոնք են մեր նեղ տեղերը, որ խանգարում են, որպեսզի բիզնեսն այդտեղ զարգանա: Այս մասին, այսօր՝ սեպտեմբերի 22-ին, ՀՀ գյուղատնտեսության նախարարությունում, ներկայացնելով նորանշանակ նախարար Իգնատի Առաքելյանին, ասել է ՀՀ վարչապետ Կարեն Կարապետյանը:
Բարձր գնահատելով նախկին նախարար Սերգո Կարապետյանի ներդրումը գյուղատնտեսության ոլորտում՝ վարչապետը շնորհակալություն է հայտնել նրան կատարած աշխատանքի համար եւ համոզմունք հայտնել, որ նա իր փորձով եւ մասնագիտական կարողություններով կշարունակի նպաստ բերել ոլորտի զարգացմանը:
Ներկայացնելով նորանշանակ նախարար Իգնատի Առաքելյանին՝ Կարեն Կարապետյանը նշել է, որ նա աշխատանքային հարուստ փորձ է կուտակել գյուղատնտեսության բնագավառում կառավարման մշակույթ ունեցող ձեռնարկությունում եւ լավ պատկերացնում է ոլորտը: Կառավարության ղեկավարը կարեւորել է գյուղատնտեսության զարգացման համալիր ծրագրի մշակումը, որը կներառի զարգացման հեռանկարներ ունեցող բոլոր ուղղությունները:
«Պետք է լինել մաքսիմալ բաց եւ հասանելի թե՛ գյուղացու, թե՛ ոլորտի գործարարի համար», - ասել է վարչապետը՝ միաժամանակ ընդգծելով, որ ի դեմս գյուղատնտեսության նախարարության՝ գյուղացին եւ գործարարը պետք է տեսնեն իրենց օգնականին, իրենց շահերի պաշտպանին, գյուղատնտեսության ոլորտի օմբուդսմենին:
(1).jpg)
