Հայաստան-Իրան ապագա ազատ տնտեսական գոտին կարող է օգնել իրանական ապրանքների հետ աշխատանքին: Այս մասին NEWS.am-ի թղթակցի հետ զրույցում նշեց ռուսական «X5 Retail Group» կոնցեռնի պետական կառույցների հետ աշխատանքի բաժնի ղեկավար Մանուչար Քութատելաձեն, որը Երեւանում է՝ «Պատրաստված է Հայաստանում» ցուցահանդեսին մասնակցելու նպատակով:
Հայաստանի եւ Եվրասիական տնտեսական հանձնաժողովի պաշտոնյաները ներկայացրել են նոր գոտու հեռանկարները: Դրա շնորհիվ իրանական արտադրանքը կարող է հեշտությամբ հասնել ռուսական շուկա: «Մենք շփվում ենք իրանական ընկերությունների հետ: Ներկայում մեր խանութներում Իրանը հիմնականում ներկայացված է մրգերով եւ բանջարեղենով, բայց համագործակցությունը կարող է ընդլայնվել»,- հայտարարեց Քութատելաձեն:
Ֆինանսական կազմակերպություններն իրենց հերթին պատրաստ են արժութային ռիսկերից ապահովագրության մեխանիզմներ առաջարկել: Ընդ որում՝ խոսքը միայն արժութային հեջի մասին չէ:
«Այդ պարագայում մենք, ամեն դեպքում, կապվում ենք դոլարին, իսկ մենք կարող ենք հեռանալ այդ բաղադրիչից: Մենք խոսում ենք այն մասին, որ յուրաքանչյուր երկիր, որն իր արժույթն ունի, կարող է աշխատել դրանով: Մեխանիզմներ կան, բիզնեսը գաղափար է տալիս այն մասին, թե ինչ է ուզում, իսկ ֆինանսական հատվածն արդեն հնարավոր միջոցներ է գտնում»,- հավելեց X5-ի մենեջերը:
Ռուսական X5 Retail group կոնցեռնը միավորում է «Պյատյորոչկա», «Պերեկրյոստոկ» եւ «Կարուսել» սուպերմարկետները: