Ես շարունակում եմ կատարել իմ պարտականությունները, հրաժարական տալու խնդիր չկա: Այս մասին, այսօր՝ սեպտեմբերի 23-ին, լրագրողների հետ հանդիպման ժամանակ նշել է Էկոնոմիկայի նախարարի պաշտոնակատար Արծվիկ Մինասյանը՝ պատասխանելով, թե իրականությանը համապատասխանո՞ւմ են մամուլում հրապարակված լուրերը, որ նորանշանակ վարչապետ Կարեն Կարապետյանի հետ լարված հարաբերությունների պատճառով հրաժարական է տալու եւ արդեն իսկ հավաքել է աշխատասենյակի իրերը:
«Խնդրում եմ՝ ով ցանկություն ունի, կարող է մտնել՝ տեսնել իմ աշխատանքային գրաֆիկը, օրը: Ես շարունակում եմ կատարել իմ պարտականությունները, հրաժարական տալու խնդիր չկա, որովհետեւ մենք ժամանակավոր զբաղեցնում ենք այս պաշտոնը, պաշտոնակատարներ են: Ըստ օրենքի կառավարության կազմավորումը ենթադրում է ՀՀ նախագահի հրամանագիր՝ վարչապետի առաջարկությամբ, որից հետո պարզ կլինի՝ նախարարը նշանակված է, թե ոչ: Այս պահին ես պաշտոնակատար եմ, շարունակելու եմ այնքան ժամանակ, քանի դեռ չի եղել նոր հրամանագիր»,- ասաց նա:
Անդրադառնալով իր եւ վարչապետ Կարեն Կարապետյանի հարաբերություններին, Արծվիկ Մինասյանը նշեց, որ իրենց միջեւ չկա որեւէ լարվածություն, չի եղել որեւէ կոնֆլիկտ: «Ես անկեղծ եմ ասում, ես իսկապես շնորհակալ եմ, որ նա ունի հստակ տեսակետ բիզնես հանրության, բիզնես հատվածի բեռը թեթեւացնելու, բյուրոկրատիան, չինովնիկությունը նվազեցնելու վերաբերյալ: Սա կարեւոր ուղղորդում է»,-ասաց նա ու հավելեց. «Վստահ եմ, որ թե ՀՅԴ ԳՄ-ն, թե ՀՀԿ ղեկավար մարմինը քաղաքական համագործակցության հուշագիրը կյանքի կոչելու պատրաստակամություն ունեն, թվացյալ լարվածությունը ավելի շատ առանձին հատվածների ցանկությունն է, քան իրականում կա: Ավելի լավ չէ՞, որ կառավարության նիստերը լինեն բաց բանավիճային»: