«Այ Թի» ոլորտը ժամանակի հրամայականն է դարձել: Այս մասին, այսօր՝ սեպտեմբերի 23-ին, ՀՀ տրանսպորտի եւ կապի նախարար Վահան Մարտիրոսյանի հետ հանդիպման ժամանակ նշել է Եվրասիական տնտեսական հանձնաժողովի կոլեգիայի անդամ (նախարար) Կարինե Մինասյանը:
Տրանսպորտի եւ կապի նախարարությունից NEWS.am-ին հայտնում են, որ Կարինե Մինասյանը, ով կոլեգիայում համակարգում է ներքին շուկաների, տեղեկատվայնացման եւ տեղեկատվական-հաղորդակցական տեխնոլոգիաների ոլորտը, շնորհավորել է Վահան Մարտիրոսյանին նախարարի պաշտոնը ստանձնելու կապակցությամբ: Նա կարեւորել է տրանսպորտի եւ կապի նախարարության հետ համագործակցությունը:
Նախարար Վահան Մարտիրոսյանը շնորհակալություն հայտնելով շնորհավորանքի համար` նշել է. «Կապի բնագավառում Հայաստանում շատ զարգացած են տեղեկատվական տեխնոլոգիաներն ու ենթակառուցվածքները: Կաշխատենք, որպեսզի թվային ինտեգրացիոն գործընթացներում շատ արագ հասնենք հաջողության»:
Նախարարը բարձր է գնահատել Եվրասիական տնտեսական միության դերը Հայաստանի տեղեկատվական տեխնոլոգիաների, ինչպես նաեւ մյուս ճյուղերի զարգացման գործում` հույս հայտնելով, որ երկկողմ համագործակցությունը կդրվի ամուր հիմքերի վրա:
