Միլիարդատեր Դոնալդ Թրամփի մերկ արձանը` ամբողջ հասակով, որը ցուցադրվում էր Մայամիի (Ֆլորիդայի նահանգ) Ուինվուդ արթ-շրջանում, անհայտ անձանց կողմից գողացվել է անցած գիշեր, հայտնում է ՏԱՍՍ-ը:
Մայամիում WSVN հեռուստաալիքը, վկայակոչելով պատկերասրահի պահակներին, հայտնում է, որ տղամարդկանց մի խումբ արձանը բարձրացրել է բեռնատար: Ականատեսներից մեկին հաջողվել է լուսանկարել առեւանգիչների մեքենան, եւ այժմ ոստիկանությունը փնտրում է դրա տիրոջը` Պեդրո Ալեխանդրո Ռոդրիգեսին, որպես «մարդու, որը քննության համար հետաքրքրություն է ներկայացնում»: «Ինչ-որ մեկը որոշել է քաղաքական ժեստ անել` այդ արձանը ստեղծելով, իսկ ուրիշ մեկն էլ` քաղաքական ժեստ` հեռացնելով այն», - արթ-շրջանի այցելուներից մեկի խոսքերն է մեջբերել հեռուստաալիքը:
Ավելի վաղ այդ արձանը կանգնած էր թիվ 95 խճուղու հրապարակում, սակայն ոստիկանության պահանջով այն տեղափոխել են, որովհետեւ «շեղում էր վարորդներին»:
Հանրապետական կուսակցությունից ԱՄՆ-ի նախագահի թեկնածուին պատկերող քանդակը նրան բոլորովին դրական լույսի տակ չէր ներկայացնում, դա մեկն էր ամերիկյան Indecline հասարակական կազմակերպության ստեղծած արձաններից, որը միավորում է ստեղծագործ աշխատողների: Այն սեպտեմբերի սկզբին տեղադրել էին Նյու Յորքի (Նյու Յորքի նահանգ), Սան Ֆրանցիսկոյի (Կալիֆորնիայի նահանգ), Քլիվլենդի (Օհայոյի նահանգ) եւ Սիեթլի (Վաշինգտոնի նահանգ) մարդաշատ վայրերում` ի նշան բողոքի ԱՄՆ-ի նախագահական ընտրապայքարում Թրամփի մասնակցությանը:
WSVN հեռուստաալիքի տվյալներով, ավելի վաղ Նյոu Ջերսիում Թրամփի արձանի առեւանգման փորձ էր արձանագրվել: «Այն ողջունում էր Նյու Յորքի ուղղությամբ խճուղով առաջացող վարորդներին», - նշվում էր ռեպորտաժում:
