Եվրոպայում անվտանգությունը կարող է կառուցվել միայն հավաքական հիմունքներով: Այս մասին սեպտեմբերի 23-ին ասել է Գերմանիայի ԱԳ նախարար Ֆրանկ Վալտեր Շտայնմայերը, ելույթ ունենալով ՄԱԿ-ի Գլխավոր վեհաժողովի 71-րդ նստաշրջանում համաքաղաքական քննարկման ժամանակ, հայտնում է ՏԱՍՍ_ը:
«Եվրոպայում ամուր անվտանգությունը կարող է միայն հավաքական լինել»,- ասել է նա: «Դրա համար ես առաջարկել եմ ուշադրությունը սեւեռել Եվրոպայում սպառազինումների նկատմամբ հսկողություն ապահովելու վրա ՝ հաշվի առնելով նոր մարտահրավերները ու նոր տեխնոլոգիաները, որոնցից շատերը չեն հիշատակվում գոյություն ունեցող փաստաթղթերում: Մեր նպատակն է ավելի շատ անվտանգություն ապահովել բոլորի համար»- շեշտել է Շտայնմայերը
«Մենք այս տարի ստանձնել ենք նախագահություն ԵԱՀԿ-ում, քանի որ ուզում ենք ամրապնդել Արեւելքի ու Արեւմուտքի միջեւ երկխոսությունը այս բարդ ժամանակներում»,- շարունակել է նա: Շտայնմայերի կարծիքով ԵԱՀԿ-ն միակ կազմակերպությունն է, որտեղ «մշտական հիմունքներով փոխգործակցում են Արեւելքն ու Արեւմուտքը»: «Մենք ունենք ՄԱԿ-ի ու դրա նման կառույցների կարիքը, որ շահերի տարբերության ու տարաձայնությունների պատճառով օտարացում չառաջանա ու հող չստեղծվի նոր հակամարտությունների համար»,- նշել է Գերմանիայի արտգործնախարարը: