ԱՄՆ-ի նախագահ Բարաք Օբաման վետո է դրել այն օրինագծի վրա, որի համաձայն, 2001 թվականի սեպտեմբերի 11-ի ահաբեկչության հետեւանքով զոհվածների ընտանիքները կարող են Միացյալ Նահանգներում դատերի միջոցով հայցեր ներկայացնել Սաուդյան Արաբիայի կառավարության դեմ, հայտնում է DW-ն:
Ավելի վաղ ամերիկյան խորհրդարանի պալատները հավանություն էին տվել այդ նախագծին, որն Օբամային էր ուղարկվել ստորագրության համար Նյու Յորքում, Վաշինգտոնում եւ Փենսիլվանիայում ահաբեկչական գործողությունների 15-րդ տարելիցի նախօրեին. ահաբեկչությանը զոհ էր գնացել մոտ 3000 մարդ:
«Խորը ցավակցություն» հայտնելով զոհվածների ընտանիքին` Օբաման նկատել է, որ նման օրենքը «վնաս կհասցներ ԱՄՆ-ի ազգային շահերին» եւ կվնասեր «ինքնիշխան պետությունների` քաղաքացիական պատասխանատվությունից ազատ լինելու բազմամյա սկզբունքներին»: 2001 թվականի սեպտեմբերին ահաբեկչություն իրականացրած 19 մարդուց 15-ը Սաուդյան Արաբիայի հպատակ էր: