ՀՀ պետական սահմանն ապօրինի հատելու մեջ մեղադրվող Արաֆադ Կամրուջաման Հոսսանի գործով նախաքննությունն ավարտվել է եւ գործն ուղարկվել դատարան:
Ըստ մեղադրական եզրակացության՝ Հոսսանն օգոստոսի 9-ին Թուրքիայի Հանրապետության տարածքից անցնելով գետը եւ հաղթահարելով Հայաստանի Հանրապետության պետական սահմանի ինժեներատեխնիկական արգելքները, առանց պատշաճ թույլտվության ապօրինի հատել է պահպանվող պետական սահմանը եւ շարժվել դեպի ՀՀ Արարատի մարզի Երասխ գյուղի ուղղությամբ: Այստեղ նա հայտնաբերվել է ՀՀ ԱԱԾ աշխատակիցների կողմից եւ բերման ենթարկվել ԱԱԾ վարչական շենք:
Հոսսանին մեղադրանք է առաջադրվել Քրեական օրենսգրքի 329-րդ հոդվածի 1-ին մասով: Նա կալանավորված է:
Թե ինչպես էր Բանգլադեշի քաղաքացին հայտնվել Հայաստանում, NEWS.am-ին մանրամասներ են հայտնի դարձել: Նրա փաստաբան Էդուարդ Աղաջանյանի խոսքով, Հոսսանն իր նախաքննական ցուցմունքում նշել է, որ ինքը Թուրքիա էր մեկնել արտագնա աշխատանքի: Այստեղ էլ նա մոլորվել է եւ հայտնվել Հայաստանում: Հոսսանը պնդել է, թե նպատակ չի ունեցել ապօրինի հատելու ՀՀ պետական սահմանը: