Վարչապետը էկոնոմիկայի նախարարի պաշտոնում ցանկանում է տեսնել բիզնեսի հետ առնչվող, բիզնես մտածողություն ունեցող անձի։ Այս մասին այսօր՝ սեպտեմբերի 26-ին, Ազգային ժողովում լրագրողների հետ զրույցում հայտարարել է ՀՅԴ խմբակցության քարտուղար Աղվան Վարդանյանն՝ անդրադառնալով Արծվիկ Մինասյանին էկոնոմիկայի նախարարությունից բնապահպանության նախարարաություն տեղափոխելու վարչապետի որոշմանը։
Վարդանյանը շեշտել է, որ իրենք վարչապետի հետ հանդիպել են եւ քննարկել այդ հարցը։
«Վարչապետի մոտեցումը հետեւյալն է՝ նոր անվանումով նախրարությունում պատկերացնում է ավելի բիզնես մտածողություն ունեցող անձ, բիզնեսի հետ առնչություն ունեցող անձ։ Իր համար շատ կարեւոր է տնտեսական բլոկի բարեփոխումները»,-ասել է Վարդանյանը։
Նա նշել է, որ վարչապետը բարձր է գնահատել Արծվիկ Մինասյանի քաղաքական հատկությունները եւ նրա հետ որեւէ խնդիր չունի։
«Ասել է՝ շատ է ուզում աշխատել պարոն Մինասյանի հետ։ Այստեղ որեւէ արտառոց բան չկա։ Վարչապետի առջեւ դրված խնդիրները մեզ համար հասկանալի են։ Պարոն Մինասյանը ամենայն հավանականությամբ կզբաղեցնի բնապահպանւթյան նախարարի պաշտոնը։ Դաշնակցության համար բացարձակ կարեւոր չէ, թե մենք քանի նախարարություն կունենաք։ ՀՅԴ-ՀՀԿ Համաձայնագրում մեր խնդիրներն ենք ձեւակերպել։ Եթե այդ խնդիրները լուծվում են, մենք կարող ենք եւ ոչ մի նախարար չունենալ, եւ կարող ենք հինգ պորտֆել ունենալ»։