Եվրախորհրդարանի՝ քաղաքացիական հարցերի, արդարադատության եւ ներքին գործերի հանձնաժողովը պաշտպանել է Ուկրաինային անվիզա ռեժիմ տրամադրելու մասին զեկույցը եւ մանդատ է տվել ԵՄ ինստիտուտների հետ բանակցությունների մեկնարկի համար, փոխանցում է ՈւՆԻԱՆ-ը:
Զեկույցին կողմ է քվեարկել 38 պատգամավոր, 4-ը դեմ են եղել, եւս մեկը՝ ձեռնպահ: Ուկրաինային անվիզա ռեժիմ տրամադրելու առաջարկը մերժելու մասին փոփոխություններից ոչ մեկը անհրաժեշտ քանակությամբ ձայներ չի հավաքել:
Այժմ երեք կառույցների՝ Եվրախորհրդարանի, Եվրահանձնաժողովի եւ Եվրոպական խորհրդի միջեւ կսկսվեն այսպես կոչված միջինստիտուցիոնալ բանակցություններ, որոնց նպատակն է համաձայնեցնել դիրքորոշումները վերջնական որոշումից առաջ:
Քվեարկության արդյունքները միջանկյալ են լինելու: Եվրամիության ընթացակարգերի համաձայն՝ վերջնական որոշումը ձայների պարզ մեծամասնությամբ կկայացնի Եվրախորհրդարանը: Համաձայնության դեպքում պատգամավորների որոշումը պետք է հաստատեն ԵՄ խորհրդի նախարարները: