ԵՄ պաշտպանական քաղաքականության իրագործման գործողությունների ծրագիրը պատրաստ կլինի նոյեմբերին, եւ միության անդամ պետությունների առաջնորդները կկարողանան հաստատել այն դեկտեմբերյան գագաթնաժողովի ժամանակ: Այս մասին սեպտեմբերի 27-ին հայտնել է ԵՄ արտաքին գործերի ու անվտանգության քաղաքականության հարցերով գերագույն ներկայացուցիչ Ֆեդերիկա Մոգերինին Բրատիսլավայում, որտեղ մասնակցելու է ԵՄ պաշտպանական գերատեսչությունների ղեկավարների ոչ պաշտոնական հանդիպմանը, հայտնում է ՏԱՍՍ-ը:
«Խոսքը ոչ թե եվրոպական բանակի ստեղծման, այլ Եվրամիության ընթացիկ 17 առաքելությունների՝ այդ թվում Միջերկրական ծովում «Սոֆիա» գործողության (միգրացիայի հսկողության նպատակով) իրականացման հարցերով գործնական միջոցառումների մասին է»,- ասել է նա:
Մոգերինին նաեւ շեշտել է, որ դրանք լրացուցիչ քայլեր են, եւ չեն փոխարինում ՆԱՏՕ-ի գործողությունները: Այսպիսով նա պատասխանել է Մեծ Բրիտանիայի քննադատությանը, որի պաշտպանության նախարար Մայքլ Ֆելլոնը ավելի վաղ այսօր հայտնել էր, որ եվրոպական բանակ կամ շտաբեր ստեղծելու ցանկացած փորձ դառնալու է Հյուսիսատլանտյան դաշինքի գործառույթների պատճենում: