Պետական մեղադրողը դատարանին խնդրում է Ղազախստանի լրագրողների միության (ՂԼՄ) ղեկավար Սեյտկազի Մատաեւին, որը մեղադրվում է խարդախության եւ հարկերի վճարումից խուսափելու համար, որպես պատիժ նշանակել վեց տարվա եւ ութ ամսվա ազատազրկում` ընդհանուր ռեժիմի գաղութում` ունեցվածքի առգրավմամբ, հայտնում է «Sputnik Ղազախստան» գործակալությունը:
Մեղադրյալի աթոռին գտնվող` ՂԼՄ-ի նախագահի որդու` Ասետ Մատաեւի համար, որը գլխավորել է «ԿազՏԱԳ» լրատվական գործակալությունը, մեղադրող կողմը խնդրում է որպես պատիժ նշանակել վեց տարվա ազատազրկում ընդհանուր ռեժիմի գաղութում` ունեցվածքի առգրավմամբ:
«Մեղադրյալների մեղքը ամբողջ ծավալով հաստատվել է: Վերջնականապես Սեյտկազի Մատաեւին նշանակել վեց տարվա եւ ութ ամսվա ազատազրկում ընդհանուր ռեժիմի գաղութում` ունեցվածքի առգրավմամբ եւ հինգ տարով զրկելով ձեռնարկատիրական գործունեությամբ զբաղվելու իրավունքից: Ասետ Մատաեւին նշանակել վեց տարվա ազատազրկում ընդհանուր ռեժիմի գաղութում», — հայտնել է դատախազ Երժան Կուրակբաեւը:
«Դատական գործը քննվում է Աստանա քաղաքի Եսիլյան թիվ 2 դատարանում, գլխավոր դատավարությունը սկսվել է օգոստոսի 23-ին: Սեյտկազի Մատաեւը մեղադրվում է «խարդախություն» եւ «բյուջե կազմակերպության կողմից հարկի եւ (կամ) այլ պարտադիր վճարների վճարումից խուսափում» հոդվածներով»: Նրա որդին` Ասետը մեղադրվում է «խարդախություն» հոդվածով: Սեյտկազի Մատաեւը փետրվարի 24-ից գտնվում է տնային կալանքում: Ասետ Մատաեւին տնային կալանք է նշանակվել մարտի 28-ին: Նրանք երկուսն էլ ամբողջությամբ հերքում են բոլոր մեղադրանքները:
