Մեծի Տանն Կիլիկիո Արամ Ա կաթողիկոսն այսօր՝ սեպտեմբերի 27-ին, մեկնել է Միացյալ Նահանգներ եւ Կանադա` հանդիսապետելու իր կաթողիկոսական ընտրության եւ օծման 20 ամյակին նվիրված տոնակատարությունները Լոս Անջելեսի, Մոնրեալի եւ Նյու Յորքի մեջ:
Մեծի Տանն Կիլիկիո կաթողիկոսարանի մամլո դիվանից NEWS.am-ին հայտնում են, որ թեեւ Արամ Ա կաթողիկոսի հայրապետական ծառայության 20 ամյակը լրացել է 2015 թվականին, սակայն Վեհափառ Հայրապետի խնդրանքով անցնող տարում որեւէ միջոցառում չկազմակերպվեց` հաշվի առնելով Հայոց ցեղասպանության 100-րդ տարելիցը:
Մեծի Տանն Կիլիկիո կաթողիկոսի այցերի ընթացքում նախատեսված են հանդիպումներ եւ զրույցներ երիտասարդների հետ, միջեկեղեցական հանդիպումներ, այցելություններ համայնքային կենտրոններ:
Վեհափառ Հայրապետը Անթիլիասի Մայրավանք կվերադառնա հոկտեմբերի 22-ին:
