Մութ սենյակում սեւ կատու մի փնտրեք, հատկապես եթե այնտեղ այն չկա: Այս մասին սեպտեմբերի 27-ին հայտարարել է ԱԺ փոխնախագահ, ՀՀԿ մամուլի քարտուղար Էդուարդ Շարմազանովը՝ երլույթ ունենալով «Ֆինանսական հավասարեցման մասին» օրինագծի քննարկմանը, որը քաղաքապետարանների համար դոտացիաներ տրամադրելու նոր համակարգ է առաջարկում:
Նրա խոսքով՝ փոփոխությունները չեն նշանակում, որ տեղական ինքնակառավարման հին համակարգը վատ է աշխատել, առավել եւս՝ որ վատ է աշխատել նախկին կառավարությունը: Չպետք է շտապել անհիմն հետեւություններ անել, որ նոր կառավարությունը ցանկանում է ամեն ինչ ջնջել եւ նորից սկսել:
«Օրակարգում է բարեփոխումների հարցը, որը թելադրված է Սահմանադրության մեջ կատարված փոփոխություններով: Եվ մենք այդ բարեփոխումներն իրականացնում ենք: Այնպես որ, հարգելի բարեկամներ, մութ սենյակում սեւ կատու մի փնտրեք: Հատկապես եթե այն ձեր ուսին է նստած: Մեկ անգամ էլ շեշտեմ՝ Հայաստանի հանրապետական կուսակցությունը 1999 թվականից ի վեր բոլոր կառավարությունների աշխատանքի համար պատասխանատու է եղել է եւ շարունակում է պատասխանատու մնալ: Մենք պատասխանատու քաղաքական ուժ ենք»,- նշել է փոխխոսնակը:
