Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում այսօր՝ սեպտեմբերի 27-ին, «Հիմնադիր խորհրդարանի» անդամ Կարո Եղնուկյանն իր փաստաբան Տիգրան Հայրապետյանի ներկայացրած ընդդեմ գլխավոր դատախազի անգործության բողոքի քննությանը ելույթով հանդես եկավ եւ կոչ արեց դատարանին արդարությամբ առաջնորդվել եւ կախում չունենալ իիշխանություններից:
«Ես շատ լավ հասկանում եմ, որ իշխանությունների պահանջով եք առաջնորդվում եւ չլոցիի նման շարունակվելու է այս գործընթացը:Կարող եք հարցնել, թե ինչու չհավատալով ձեզ` բողոք ենք ներկայացրել: Բողոք ենք ներկայացրել, որ առաջիկայում Եվրոպական դատարանին ասենք, որ սպառել ենք ներպետական բոլոր ատյանները, սա նաեւ ինձ համար հնարավորություն է տեսնել իմ ընտանիքի անդամներին, որովհետեւ այսօր ես այնքան վտանգավոր եմ դարձել, որ անգամ թույլ չեք տալիս տեսակցել ընտանիքիս անդամներին: Այստեղ է ԱՄՆ-ից ժամանած մայրս, եղբայրս, աղջիկներս, կինս, որոնք ինձ տեսնելու համար են եկել այստեղ: Դատարանը պետք է կարողանա արդարություն քարոզի, ունենա նրանից, ինչ ունի ցուլը երկու հատ, բայց եզը չունի ոչ մի հատ: Ես կուզենայի, որ մեր դատարանը ունենա այն, ինչ ունի ցուլը եւ լինի արդարության կողմնակից»:
Դատական նիստերի դահլիճում Կարո Եղնուկյանը պատասխանելով լրագրողի հարցին` արդյոք քաղաքական հայացքների համար է հալածվում, պատասխանեց` «Իհարկե, ես քաղաքական հալածյալ եմ եւ իմ հանդեպ քաղաքական հետապնդում է իրականացվում»:
Կարո Եղնուկյանին նրա ընկերներն ու ընտանիքի անդամները դատական նիստերի դահլիճում դիմավորեցին ծափահարություններով:
Նշենք, որ փաստաբանը բողոք է ներկայացրել՝ պահանջելով պարտավորեցնել գլխավոր դատախազին կատարել իր գործառույթները: Նա ըստ փաստաբանի, մերժելով իրենց ներկայացրած բազմաթիվ միջնորդությունները, անգործություն է դրսեւորել ինչպես «Սասնա ծռեր» խմբի, այնպես էլ խմբին օժանդակելու մեղադրանքով կալանավորված՝ «Հիմնադիր խորհրդարանի» անդամ Կարո Եղնուկյանի գործերով:
Փաստաբանը մեղադրանքը կեղծ ու անհիմն է համարում: