ՌԴ վարչապետ Դմիտրի Մեդվեդեւը Թուրքիայի վարչապետ Բինալի Յիլդիրիմի հետ հեռախոսազրույցի ընթացքում քննարկել է մի շարք էներգետիկ նախագծեր, երկկողմ շփումներ եւ այլ հարցեր: Այդ մասին հայտնել է ՌԴ կառավարության մամուլի ծառայությունը` ճշտելով, որ զրույցը տեղի է ունեցել թուրքական կողմի նախաձեռնությամբ, հայտնում է ՏԱՍՍ-ը:
«Դմիտրի Մեդվեդեւը եւ Բինալի Յիլդիրիմն անդրադարձել են առեւտրատնտեսական փոխգործակցության այժմեական հարցերի, էներգետիկայի ոլորտում համատեղ խոշոր նախագծերի իրականացմանը, ներառյալ «Ակկույու» ԱԷԿ-ի եւ «Թուրքական հոսք» գազատարի շինարարությունը: Վարչապետները քննարկել են նաեւ առաջիկա երկկողմ շփումների գրաֆիկը», - ասված է հաղորդագրության մեջ:
Զրույցի ընթացքում թուրք գործընկերը Մեդվեդեւին նաեւ շնորհավորել է Պետդումայի ընտրությունների հաջող անցկացման եւ դրանցում «Եդինայա Ռոսիա» կուսակցության հաղթանակի կապակցությամբ: «Բինալի Յիլդիրիմն ընդգծել է իր գլխավորած կառավարության հետաքրքրվածությունը ռուս-թուրքական հարաբերությունների առաջընթաց զարգացմամբ», - նշել են ռուսական կառավարությունից:
«Թուրքական հոսք» նախագիծը ռուսաստանյան ղեկավարության կողմից ազդարարվել է 2014 թվականի դեկտեմբերին` փոխարինելու «Հարավային հոսք»-ին: Ենթադրվում է, որ առաջին թելով գազի մատակարարումներն ամբողջությամբ նախատեսված կլինեն թուրքական աճող շուկայի պահանջմունքները բավարարելու համար:
ՌԴ-ի եւ Թուրքիայի եւս մեկ խոշոր էներգետիկական նախագիծ է Մերսինի նահանգում ատոմային «Ակկույու» կայանի կառուցումը, որի կազմում ընդհանուր 4800 ՄՎտ հզորությամբ չորս բլոկ կլինի: Նախագծի արժեքը գնահատվում է 22 մլրդ դոլար: Այսօրվա դրությամբ ՌԴ-ն արդեն ատոմակայանի շինարարության մեջ մոտ 3 մլրդ դոլար է ներդրել: ԱԷԿ-ի առաջին բլոկի շահագործումը նախատեսված է 2020 թվականին:
