Հայաստան մինչեւ 200 եվրո արժեքով բեռի ներմուծումն ազատվել է մաքսատուրքից: «Մաքսային կարգավորման մասին» օրենքում համապատասխան փոփոխությունների օրինագիծը ԱԺ-ն սեպտեմբերի 28-ի նիստում միաձայն՝ 105 կողմ ձայնով ընդունել է երկրորդ եւ վերջնական ընթերցմամբ: Օրինագիծը կառավարությունն էր մշակել, որին ավելի ուշ որպես համահեղինակ միացել էր անկախ պատգամավոր Էդմոն Մարուքյանը:
Օրինագծով մաքսատուրքից ազատվում են մինչեւ 200 եվրո արժեքով ապրանքախմբերը: Այդ վճարումների չեղարկման շնորհիվ բիզնեսը 6500 դրամ կտնտեսի մաքսային ձեւակերպումներից եւ 10-15 հազար՝ մաքսային միջնորդների ծառայություններից: Արդյունքում կխնայվի 40-45 դոլար, ըստ որում՝ ոչ թե միաժամանակ, այլ ապրանքի յուրաքանչյուր խմբաքանակի ներկրման ժամանակ:
Նշենք, որ Հայաստանում փոքր բիզնեսի աջակցմանը միտված նշված միջոցառումը նախաձեռնվել է Եվրասիական միության մաքսային օրենսդրության համաձայն:
