ՀՀ գյուղատնտեսության նորանշանակ նախարար Իգնատի Առաքելյանը այսօր` սեպտեմբերի 28-ին, մեկնել է Վայոց ձորի մարզի Աղավնաձոր գյուղ:
Այս պահին հանդիպում է անցկացնում 11 ամիս առաջ խաղողի բերքը մթերած եւ մինչեւ այժմ գումարը չստացած խաղողագործների հետ, նրանք նախարարին են ներկայացնում իրենց խնդիրը:
Հիշեցնենք, որ սեպտեմբերի 19-ին աղավնաձորցիները փորձել էին փակել Երեւան-Մեղրի միջպետական ճանապարհը, իսկ սեպտեմբերի 15-ին հանդիպել էին Վայոց Ձորի մարզպետ Հարություն Սարգսյանի հետ, որն ասել էր, որ գումարի խնդիրը կլուծվի նոր կառավարության ձեւավորումից հետո:
Մարզպետն ու «Վեդի ալկո» ընկերության տնօրեն Մանվել Ղազարյանը սեպտեմբերի 1-ին աղավնաձորցիներից 15 օր ժամանակ էին խնդրել, որպեսզի գործարանը կարողանա մարել 140 միլիոն դրամի պարտքը: Ընդ որում, 15 օրում խնդիրը լուծելու խոստումը տվել էր անձամբ վարչապետ Հովիկ Աբրահամյանը:
Ավելի վաղ տեղեկացրել էինք, որ 11 ամիս առաջ մթերված խաղողի դիմաց գումարը չստացած աղավնաձորցիները բողոքի ակցիա էին արել. փակել էին դպրոցի մուտքը եւ Գիտելիքի օրը երեխաներին չէին ուղարկել դպրոց: