Ավելի քան երկու տասնյամյակ առաջ Շիմոն Պերեսը կարողացել էր հասնել համաձայնությունների, որոնք հիմք էին դրել պաղեստինյան անկախ պետություն ստեղծելու եւ Իսրայելի հետ խաղաղության հասնելու ուղղությամբ առաջ շարժվելու համար: Այսօր 93 տարեկանում կյանքից հեռացած այդ պետական այրի կյանքի գործը կարծես վտանգված է, գրում է The Wall Street Journal–ը:
«Օսլոյում կնքված համաձայնագրերի իրագործման հետ կապակցված խնդիրները բազմաթիվ են: Իսրայելն ու պաղեստինյան ղեկավարությունը չեն կարողանում պայմանավորվել հանդիպման մասին՝ բանակցությունները շարունակելու համար: Պաղեստինյան ազգային շարժումը մասնատվել է «Ֆաթհի» ու «Համասի», որը խոստանում է ոչնչացնել Իսրայելը: Միջազգային համայնքը չի կարողանում հասկանալ, թե ինչպես վերականգնի բանակցությունները ու հասնի վերջնական խաղաղ համաձայնագրի»,- գրում է թերթը:
1993-ին Պերեսը գաղտնի ժամանել էր Օսլո՝ պաղեստինյան բանակցողների հետ հանդիպման: Այդ քայլի արդյունքում էլ հենց Իսրայելի վարչապետ Իցհակ Ռաբինի ու Պաղեստինի ազատագրական կազմակերպության առաջնորդ Յասիր Արաֆատն իրար ձեռք սեղմեցին Սպիտակ տան մարգագետնում:
«Իսրայելապաղեստինյան խաղաղ բանակցությունների վերջին փուլը, որը պետք է հիմնված լիներ Օսլոյում ձեռք բերված համաձայնությունների վրա՝ անկախ պաղեստինյան պետություն ստեղծելու նպատակով, ավարտվեցին ձախողումով 2014-ին», ասվում է հոդվածում:
Նեթանյահուի քննադատները ասում են, որ նա խաղաղ բանակցությունների մասին խոսում է միայն միջազգային համայնքին հանգստացնելու համար:
«Ցավոք ներկա կառավարությունը մտադիր չէ անել որեւէ բան երկու պետությունների ստեղծման միջոցով հակամարտությունը լուծելու համար» համարում է Պերեսի համախոհ Գիլեադ Շերը: Չնայած խաղաղության մշուշոտ հեռանկարներին, Պերեսը երբեք չէր հրաժարվում երկու պետությունների գաղափարից, ասում է Յոսսի Բեյլինը՝ նախկին փոխարտգործնախարարը, որը Պերեսի հետ միասին նախաձեռնել էր Օսլոյում բանակցային գործընթացը: «Մեզնից ոչ ոք չի հավատում, որ այնտեղ երբեք խաղաղություն չի լինի,- ասում է նա,- ու դա չի քննարկվում»:
