Ադրբեջանում սահմանադրական հանրաքվեն չէր համապատասխանում ազգային ընտրական օրենսդրության պահանջներին եւ միջազգային ստանդարտներին: Նման եզրակացության են եկել «Եվրոպական պլատֆորմ՝ հանուն Ժողովրդավարական ընտրությունների» (EPDE) դիտորդական կազմակերպության փորձագետները, հայտնում է DW-ն:
«ՀԿ-ների մասին օրենքում փոփոխությունների արդյունքում անկախ քաղաքացիական հասարակությունը ի վիճակի չէ գոյատեւել այդ երկրում: Քրեական հետաքննությունները եւ խոշոր հարկային տուգանքները թույլ չեն տվել քաղաքացիական հասարակության կազմակերպություններին լրջորեն մասնակցել հանրաքվեին եւ զբաղվել ընտրողների իրազեկմամբ»,- ասված է հայտարարության մեջ:
Հայտարարության մեջ նշվում է, որ քաղաքական ճնշումների սաստկացումը հանգեցրել է հանրաքվեի ժամանակ քաղբանտարկյալների քանակի աճին: EPDE փորձագետները նշում են, որ հանրաքվեում գրանցվել են բազմաթիվ խախտումներ, այդ թվում՝ լցոնումներ, «կարուսելներ», առանց հաշվառման անձանց քվեարկության դեպքեր, ընտրողների մասնակցության չափազանցված տվյալներ:
Հեղինակները նաեւ արձանագրում են, որ Ադրբեջանում չեն եղել բաց հանրային բանավեճեր կամ բնակչությանն իրազեկող լուրջ քարոզարշավ:
