ՀՀԿ-ն իշխող կուսակցություն է եւ պատահական որոշումներ չի կայացնում: Հարցին, թե ինչու «Հանրապետականը» որոշեց հենց ձեզ սատարել, ոչ թե ՀՀԿ-ական գործող քաղաքապետին, այսպես արձագանքեց Սեւանի քաղաքապետի թեկնածու, անկուսակցական Սարգիս Մուրադյանը:
«Ես ինքնաառաջադրվել եմ որպես անկուսակցական թեկնածու, եւ ընթացքում ՀՀԿ-ն որոշում է կայացրել սատարել ինձ: Կարծում եմ` իմ ուժը տեսել է որպես երիտասարդ, որպես կրթված: Ես արդեն իսկ բարձր պաշտոն եմ զբաղեցրել, կարծում եմ` իմ ուժը տեսել է եւ զգացել, որ ինձ սատարելով` ես իմ ծառայությունները ավելի լավ կանեմ»,- NEWS.am-ի հետ զրույցում ասաց Սարգիս Մուրադյանը:
Նշենք, որ Սեւանում ակտիվ լուրեր են շրջանառվում, որ «Սեւան» ազգային պարկի տնօրենի տեղակալ Սարգիս Մուրադյանին սատարում է Գեղարքունիքի մարզպետ Ռաֆիկ Գրիգորյանը, որը լարված հարաբերություններ ունի Սեւանի քաղաքապետ Ռուդիկ Ղուկասյանի հետ: Ըստ տարբեր տեղեկությունների` Մուրադյանը հենց մարզպետի թեկնածուն է Սեւանում: Սարգիս Մուրադյանն այդ տեղեկությունները կարծես չի հերքում. «Ես հետեւյալ կերպ կմեկնաբանեմ, հարգարժան մարզպետը Գեղարքունիքի մարզային կառույցի ղեկավարն է, իսկ կուսակցությունն էլ որոշում է կայացրել սատարել Սարգիս Մուրադյանին, բնականաբար, որոշումը պետք է արվի»:
Այնուամենայնիվ, Սարգիս Մուրադյանը նշեց, որ ինքն անձամբ Ռուդիկ Ղուկասյանի հետ ոչ մի անձնական խնդիր կամ լարված հարաբերություններ չունի:
NEWS.am-ը փորձեց զրուցել նաեւ գործող քաղաքապետի հետ: Նա կտրականապես հրաժարվեց խոսել` նույնիսկ արգելելով իր շտաբի պետին քարոզարշավի վերաբերյալ փոքրիկ հարցազրույց տալ:
Նշենք, որ Սեւանում քաղաքապետի ընտրությունները կկայանան հոկտեմբերի 2-ին:
