Ռուսաստանի ԱԳ նախարարության պաշտոնական ներկայացուցիչ Մարիա Զախարովան Facebook-ի իր էջում մեկնաբանել է ԱՄՆ պետքարտուղարության խոսնակ Ջոն Քիրբիի ելույթը, որը հայտարարել էր Ռուսաստանի քաղաքներում Սիրիայից եկած գրոհայինների հնարավոր ահաբեկչությունների մասին: Նրա խոսքը բարձրաստճան դիվանագետը համեմատել է «հարձակվիր» հրամանի հետ, հայտնում է Lenta-ն:
Զախարովան, մասնավորապես, գրել է. «Մեր ամերիկացի գործընկերներին մի քանի հստակեցնող հարց ուղղեմ մինչ կհնչի պաշտոնական արձագանքը: Դրանով (ահաբեկչություններով, ծայրահեղականությամբ) կզբաղվեն «չափավորնե՞րը»: Այն նո՞ւյն չափավորները, որոնց կես տարի է Վաշինգթոնը չի կարողանում տարանջատել Նուսրայից»:
ՌԴ ԱԳՆ պաշտոնական ներկայացուցիչը նաեւ հարցրել է՝ արդյոք «որեւէ այլ պարադիգմա՞ են համարվում» Ֆրանսիայում, ԱՄՆ-ում եւ այլ երկրներում իրականացված ահաբեկչությունները, նաեւ Սիրիայում դաիշականների կողմից գլխատված բոլոր ազգությունների մարդիկ: «Իսկ ձեզ չի՞ թվում, որ «պարկերում դրված դիակների», «ռուսական քաղաքներում ահաբեկչությունների» «օդանավերի կորուստների» մասին բարբաջանքն ավելի նման է «հարձակվիր» հրամանին, քան դիվանագետի մեկնաբանության»,- ամփոփել է Զախարովան:
