Հայաստանի ընտրատեղամասերում նկարահանումներն իրականացնելու է անկախ ընկերությունը: Այս մասին ասված է ՀՀ Ընտրական օրենսգրքում փոփոխությունների մասին նախագծում, որը հավանություն է ստացել սեպտեմբերի 29-ին Կառավարության նիստում:
Պետական մրցույթով ընտրված ընկերությունը ԿԸՀ-ից թույլտվություն կստանա նկարահանում եւ օնլայն հեռարձակում իրականացնելու համար: Հեռարձակման համար կբացվեն հատուկ կայքեր:
Անշարժ խցիկները կնկարահանեն քվեատուփը, տեղամասի կենտրոնը, մուտքը 50 մ շառավղով, ինչպես նաեւ ընտրողների գրանցման, քվեաթերթիկներ հանձնելու եւ քվեները հաշվելու տեղերը: Քվեախցիկներում նկարահանում չի իրականացվի:
Տեղամասային ընտրական հանձնաժողոովները պարտավոր են աջակցել ընտրված կազմակերպությանը նկարահանում եւ հեռարձակում իրականացնելիս, սակայն նրանք պատասխանատու չեն որակի համար: Տեսագրության պատճեն ուղարկվելու է ընտրական հանձնաժողովներին, ընտրություններին մասնակցող քաղաքական ուժերին եւ դիտորդներին:
