Երեւանի Կոնդ թաղամասի, Հանրապետություն 33-ի, Ֆիրդուս փողոցի մի խումբ խաբված բնակիչները, որոնք այսօր՝ սեպտեմբերի 29-ին, բողոքի ակցիա էին անում Կառավարության դիմաց, երկրորդ անգամ փողոց փակեցին, այս անգամ՝ Վազգեն Սարգսյանը։
NEWS.am-ի թղթակիցը հաղորդում է, որ բնակիչներին հաջողվեց շուրջ հինգ րոպե փակ պահել փողոցը, մինչեւ ոստիկանները հեռացրին նրանց փողոցի երթեւեկելի մասից:
«Մենք ստիպված ենք այս քայլին դիմում, արդեն այլ քայլ չի մնացել անելու, ամեն անգամ մեզ խաբում են ու արդեն քանի տարի է՝ մեր բնակարանների խնդիրը չի լուծվել»,- լրագրողների հետ զրույցում ասաց խաբված բնակիչներից Օֆելյան:
Մեր թղթակցի փոխանցմամբ՝ այս պահին ոստիկանները կանգնած են Վազգեն Սարգսյանի փողոցի մոտ եւ թույլ չեն տալիս բնակիչներին մոտենալ փողոցի բանուկ հատվածին:
Հիշեցնենք, որ մինչ այդ էլ բնակիչները փորձել էին փակել Տիգրան Մեծ պողոտան, սակայն ոստիկանները հրելով դուրս բերեցին պողոտայի երթեւեկելի մասից:
Հիշեցնենք, որ տասը տարի առաջ կառավարությունը որպես գերակա շահ է ճանաչել վերը նշված տարածքները եւ բնակիչների դուրս հանել իրենց բնակարաններից՝ խոստանալով փոխհատուցում, սակայն մինչեւ այժմ չի կատարել ստանձնած պարտավորությունները։ Բնակիչներն ապրում են վարձով եւ փոխհատուցում են պահանջում: