Հռոմի պապ Ֆրանցիսկոսը սեպտեմբերի 30-ին սկսում է իր եռօրյա այցը Վրաստան ու Ադրբեջան:
haqqin.az-ը, վկայակոչելով Վատիկանի մամուլի ծառայությունը, հայտնում է, որ այցի ընթացքում Հռոմի պապը հանդիպումներ կունենա երկու երկրների կրոնական ու քաղաքական առաջնորդների հետ:
Այսօր ցերեկը Հռոմի Պապը Թբիլիսի է ժամանելու: Օդանավակայանում ողջույնի պաշտոնական արարողությունից հետո Պապը ուղեւորվելու է նախագահական պալատ, որտեղ կհանդիպի Վրաստանի նախագահ Գեորգի Մարգվելաշվիլու հետ: Հետո նախագահական նստավայրի բակում Հռոմի պապն ու նախագահը ողջույնի խոսքով կդիմեն իշխանության, քաղաքացիական հասարակության ու դիվանագիտական կորպուսի ներկայացուցիչներին: Հոկտեմբերի 1-ին Միխայիլ Մեսխայի անվան մարզադաշտում Պապը սուրբ պատարագ է մատուցելու, որից հետո հանդիպելու է վրացի կաթոլիկ հոգեւորականների ու եկեղեցու սպասավորների հետ:
Հոկտեմբերի 2-ի առավոտյան քահանայապետը Թբիլիսիից Բաքու կժամանի: Ադրբեջան այցելությունը կսկսվի պապի պատարագով Բաքվի՝ Կույս Մարիամի եկեղեցում: Հետո ծրագրված են Պապի հանդիպումները նախագահ Իլհամ Ալիեւի, Կովկասի մուսուլմանների միության ղեկավարության, Ռուս ուղղափառ եկեղեցու ու հրեական համայնքի հետ:
Հիշեցնենք, որ Հռոմի պապ Ֆրանցիսկոսը Հայաստան էր այցելել այս տարվա հունիսին: