Ոստիկանության աշխատակիցների նկատմամբ բռնություն գործադրելու եւ զանգվածային անկարգություններ հրահրելու մեջ մեղադրվող 24-ամյա Արսեն Մկրտումյանն իրեն առաջադրված մեղադրանքը չի ընդունում: NEWS.am-ի հետ զրույցում Արսենի պաշտպան Արա Ղարագյոզյանը նշեց, որ իր պաշտպանյալը հուլիսի 20-ին եղել է Խորենացի փողոցում, մասնակցել խաղաղ ցույցի, սակայն, բռնություն չի գործադրել որեւիցե մեկի նկատմամբ:
Ըստ մեղադրանքի Արսեն Մկրտումյանը 2016թ. հուլիսի 20-ին Երեւան քաղաքում տեղի ունեցած անկարգությունների ժամանակ բռնություն է գործադրել ոստիկանության աշխատակիցների նկատմամբ` ոտքերով հարվածել եւ քար է նետել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցների վրա:
Ավելի վաղ տեղեկացրել էինք, որ Էրեբունի եւ Նուբարաշեն վարչական շրջանների ընդհանուր իրավասության դատարանն սեպտեմբերի 29-ին, որոշել էր ոստիկանության աշխատակիցների նկատմամբ բռնություն գործադրելու եւ զանգվածային անկարգություններ հրահրելու մեջ մեղադրվող Արսեն Մկրտումյանի, Գագիկ Միքայելյանի եւ Սոսո Մարգարյանի գործերի քննությունն ուղարկել Կենտրոն եւ Նորք-Մարաշ վարչական շրջանների ընդհանուր իրավասության դատարան:
