«Իրավունքների պաշտպանություն առանց սահմանների» ՀԿ-ի տվյալներով հուլիսյան իրադարձությունների ժամանակ բերման ենթարկված քաղաքացիների թիվը հասել է 730-ի: Այս մասին այսօր՝ սեպտեմբերի 30-ին, լրագրողների հետ հանդիպմանն ՀԿ ղեկավար Հայկուհի Հարությունյանը՝ նշելով, որ իրենք այդ թիվը վերցրել են ոստիկանության պաշտոնական վիճակագրությունից եւ կարծում են՝ դա նվազագույն թիվն է:
«Այդ օրերին արագ արձագանքելով փորձել ենք օժանդակել բերման ենթարկված քաղաքացիներին: Ավելի քան 20 տուժողների հետ մասնակցել ենք հարցաքննության պրոցեսին»,- ասաց նա:
Հայկուհի Հարությունյանը նշեց, որ այդ օրերին մարդու իրավունքների աննախադեպ ծավալներով խախտումներ են արձանագրվել: Առաջինը՝ ըստ նրա, խախտվեց խաղաղ հավաքների իրավունքը:
«Հավաքի իրավունքների խախտմանը զուգընթաց ոստիկանների կողմից կամայական գործողություններ եղան, որոնց հետեւանքով քաղաքացիները բերման ենթարկվեցին: Ոստիկանության բաժիններում անձիք հասանելիություն չունեցան սննդի, ջրի, զուգարանի: Նրանք ոչ իրավական հիմքերով ոչ իրավաչափորեն պահվեցին անազատության մեջ: Դրան զուգընթաց հուլիսի 20-ից սկսված կեղծ քրգործեր հարուցվեցին հավաքի մասնակիցների նկատմամբ»,- ասաց Հայկուհի Հարությունյանը:
ՀԿ ղեկավարի խոսքով՝ մեծ ծավալի խախտումներ են արձանագրվել նաեւ լրագրողների, իրավաբանների նկատմամբ:
Հանդիպմանը ներկա փաստաբան Արայիկ Պապիկյանը նշեց, որ իրեն խոչընդոտել են մուտք գործել ոստիկանական բաժանմունք:
«Մի քանի անգամ մուտք չեմ կարողացել ունենալ քննչական բաժին, իսկ նրանցից մեկում շուրջ 20 րոպե շենքին մոտենալ թույլ չտվեցին հորդառատ անձրեւի պայմաններում: Նույնիսկ շենքին մոտենալու հնարավորություն չկար, այսինքն նրանք ոչ մի մեթոդ չէին ընտրում: Եթե անթույլատրելի վերաբերմունքը կար քաղաքացիների նկատմամբ, հավասարապես տարածվում էր լրագրողների, փաստաբանների, նաեւ այն անձանց նկատմամբ, ովքեր առավել իրազեկ էին: Ոստիկանությունը առավել ջանքեր գործադրեց ցույց տալու, որ իրականում ոչ մի բարեփոխում էլ չի գործել»,- ասաց Արայիկ Պապիկյանը:
