Հանրապետական կուսակցության մեջ կատարվող ընդարձակ ներկապնակով փոփոխությունները չեն նշանակում, որ կուսակցությունը մասնատման է գնում կամ կուսակցության մեջ կարող են արմատական ուղղություններ առաջանալ: Այս մասին սեպտեմբերի 30-ին մամուլի ասուլիսի ժամանակ հայտարարել է ԱԺ Արտաքին հարաբերություների մշտական հանձնաժողովի հանրապետական նախագահ Արտակ Զաքարյանը:
Նրա խոսքով՝ կառավարության կազմի փոփոխությունը չի նշանակում քաղաքական հայացքների փոփոխություն: «Հայաստանի Հանրապետական կուսակցությունը մեծ թիմ է՝ երկարատեւ պատմությամբ, որը սերում է Խորհրդային Միության տարիների այլախոհական շարժումից:
Մենք օբյեկտիվորեն ընդարձակ ներկապնակ ունենք, եւ հենց դրա շրջանակում պետք է փոփոխություններ կատարվեն: Այդ փոփոխությունները չեն նշանակում, որ ՀՀԿ-ն մասնատման է գնում կամ կուսակցության մեջ կարող են արմատական ուղղություններ առաջանալ»,- ընդգծել է Արտակ Զաքարյանը:
ՀՀԿ ներսում կուսակցական ժողովրդավարությունը, ըստ նրա, պահպանվում է, տարբեր կարծիքները ողջունելի են: «Սակայն քաղաքական որոշումները մենք պարտավոր ենք կատարել: Այս տեսակետից Հանրապետական կուսակցությանը ոչ մի ներքին ըմբոստություն չի սպառնում»,- ամփոփել է Արտակ Զաքարյանը: