Վրաստանի նախագահ Գեորգի Մարգվելաշվիլին Հռոմի պապ Ֆրանցիսկոսին Վրաստան է հրավիրել՝ հրավերքը չհամաձայնեցնելով համայն Վրաստանի կաթողիկոս-պատրիարք Իլյա 2-րդի հետ: Այս մասին «Sputnik-Գուզիա»-ին հայտարարել է Դիղոմիի Սուրբ Մարինա եկեղեցու վանահայր Դավիթ Իսակաձեն:
Ներկայումս Թբիլիսիի միջազգային օդանավակայանից ոչ հեռու, ուր ժամանել է Հռոմի կաթոլիկ եկեղեցու հովվապետը, տեղի է ունենում բողոքի ակցիա, որին մասնակցում են հոգեւորականության եւ եկեղեցական համայնքների 100-ից ավելի ներկայացուցիչներ:
«Մենք բողոքում ենք Հռոմի պապի Վրաստան այցի դեմ, քանի որ պապիզմը մարդկության համար հոգեւոր մեծ անկում է: Պապիզմը ոչնչացրել է առաքյալների եւ դավանաբանների ուսմունքը, իր ուսմունքով այնպիսի անընդունելի դավանանքներ եւ օրենքներ է ներդրել, որոնք ոչ թե մարդկանց հոգիները փրկում են, այլ կործանում են»,- ասել է հոգեւորականը:
Ինչպես հայտարարում են Վատիկանում, պապը Վրաստան է գնում առաքելական առաքելությամբ, այսինքն՝ նա մեզ մոտ է գալիս ոչ թե քարոզելու այն, ինչ մեզ սովորեցրել է եկեղեցին, այլ Պապի մտքերը քարոզելու, նշել է հոգեւորականը:
«Պապին Վրաստան է հրավիրել նախագահ Գեորգի Մարգվելաշվիլին՝ դա չհամաձայնեցնելով համայն Վրաստանի կաթողիկոս-պատրիարք Իլյա 2-րդի հետ, ինչով նրան անհարմար վիճակի մեջ է դրել»,- ասել է Իսակաձեն: Եթե պատրիարքը չհրավիրեր կաթոլիկ եկեղեցու ղեկավարին, նա չէր գա, ընդգծել է հոգեւորականը:
