Երեւանի Նոր Նորքի 9-րդ զանգվածի բնակարաններից մեկում 2015թ. փետրվարի 6-ին նռնակ պայթեցնելու մեջ մեղադրվող 52-ամյա Մելիք Գալստյանը հարկադիր բուժման է ուղարկվել: Այս մասին NEWS.am-ը տեղեկանում է դատական տեղեկատվական համակարգից:
Դատարանը ապացուցված է համարել, որ նա նռնակը նետել է՝ գտնվելով անմեղսունակության վիճակում եւ ազատել է նրան քրեական պատասխանատվությունից եւ պատժից՝ կիրառելով բժշկական բնույթի հարկադրանքի միջոց` նրան տեղավորելով հոգեբուժական հիվանդանոցի հատուկ տիպի հոգեբուժական բաժանմունքում:
Հիշեցնենք, որ 2015թ. փետրվարի 6-ին Նոր Նորքի 9-րդ զանգվածի 17-րդ շենքի բնակարաններից մեկում Մելիք Գալստյանը նռնակ էր պայթեցրել, ինչի հետեւանքով նրա կինը` Անահիտ Խաչատրյանը, եւ կնոջ քրոջ թոռը` 4-ամյա Ելենան, որը այդ պահին գտնվել էր Անահիտի խնամքի տակ, մարմնական վնասվածքներով տեղափոխվել էին հիվանդանոց: Երեխային վիրահատել էին, հեռացրել ձախ ոտքի թաթը:
Մելիք Գալստյանը կլաանավորվել էր, ինքնախոստովանական ցուցմունք տվել եւ ասել, որ խանդի հողի վրա է արել այդ ամենը:
Նա մեղադրվում էր ՔՕ 34-104 հոդվածի 2-րդ մասի 6-րդ կետով (սպանության փորձ), եւ ՔՕ 235 հոդվածի 1-ին մասի հատկանիշներով (ապօրինի զենք զինամթերք պահել), գործով առաջին դատական նիստն այսօր էր, որը հետաձգվեց։