ՀՀ քննչական կոմիտեի Արմավիրի մարզային քննչական վարչության Վաղարշապատի քննչական բաժնում հարուցվել է քրեական գործ՝ Արմավիրի մարզի Նորակերտ գյուղի 2 բնակչի ծանր մարմնական վնաս պատճառելու դեպքի առթիվ: Ձեռնարկված քննչական-օպերատիվ միջոցառումների արդյունքում առերեւույթ հանցագործություն կատարած անձի ինքնությունը պարզվել է եւ ձերբակալվել:
2016 թվականի սեպտեմբերի 29-ին՝ ժամը 21:40-ի սահմաններում, Էջմիածնի բժշկական կենտրոնից ահազանգ է ստացվել առ այն, որ Արմավիրի մարզի Նորակերտ գյուղի անչափահաս բնակիչը «կրծքավանդակի ձախ կեսի ծակած-կտրած թափանցող վերք` թոքի վնասվածք» ախտորոշմամբ, եւ նույն գյուղի 52-ամյա բնակիչը՝ կրծքավանդակի շրջանում մարմնական վնասվածքներով, տեղափոխվել են բժշկական կենտրոն:
Նախնական տվյալների համաձայն՝ Նորակերտ գյուղի 17-ամյա եւ 52-ամյա բնակիչները մարմնական վնասվածքներն ստացել են սեպտեմբերի 29-ին՝ ժամը 20:00-ի սահմաններում, վերջինիս տան դիմաց կենցաղային հարցերի շուրջ տեղի ունեցած վիճաբանության ժամանակ:
Դեպքի առթիվ Վաղարշապատի քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասի հատկանիշներով: Քրեական գործով ձեռնարկված անհետաձգելի քննչական գործողությունների արդյունքում պարզվել է առերեւույթ հանցագործություն կատարած անձի ինքնությունը: Վեջինս ձերբակալել է եւ հարցաքննվել դեպքի շուրջ:
Նորակերտ գյուղի 2 բնակիչները ճանաչվել են տուժող, սակայն, բժշկական տեղեկանքի համաձայն, ի վիճակի չեն եղել ցուցմունք տալու:
Կատարվել է դեպքի վայրի զննություն, առգրավվել են տուժողների եւ կասկածյալի հագուստները, ինչպես նաեւ՝ հանցագործության գործիք հանդիսացող դանակը:
Նախաքննությունը շարունակվում է, կատարվում են անհրաժեշտ քննչական գործողություններ՝ դեպքի բոլոր հանգամանքների բազմակողմանի, օբյեկտիվ եւ լրիվ քննությունն ապահովելու ուղղությամբ, հանձնարարություն է տրվել ոստիկանության համապատասխան ստորաբաժանումներին` անհրաժեշտ օպերատիվ-որոնողական միջոցառումներ իրականացնելու վերաբերյալ:
