Միրեյ Հինթոյանն ու նրա 12-ամյա եղբայր Արմանն իրենց ընտանեկան սուպերմարկետում են եղել, երբ սկսվել է Հալեպի հրթիռակոծումը: Այս ասված է Հալեպում զոհված սիրիահայերի մասին AFP-ի հոդվածում:
Սիրիական լողի աստղ Միրեյը որոշել էր բաց թողնել մարզումն ու մի քիչ աշխատել ընտանեկան խանութում:
«Նրանք գնացին Աստծու մոտ: Գուցե նրա հետ ապրելն ավելի լավ է, քան պատերազմի մեջ»,- ասում է մայրը՝ Բեթթին, դիտելով սեւահեր դստեր մեդալներն ու նրա եւ եղբոր լուսանկարը: Բեթթիի եւ Վիգենի մյուս որդին՝ 19-ամյա Մովսեսը, ողջ է մնացել, բայց ծանր վիրավորվել է:
Միրեյը Սիրիայի չեմպիոնուհի էր, երազում էր դիետոլոգ դառնալ: «Միրեյը սովորաբար ամեն օր ժամը 11-ի սահմաններում լողավազան էր գնում, բայց այդ օրը խանութ եկավ: Ասաց՝ չէր ուզում լողալ: Ես նրան խնդրեցի տուն գնալ, բայց հրաժարվեց»,- պատմում է Բեթթին:
Նա նույնպես պայթյունի պահին խանությում է եղել: Ասում է՝ պայթյունի ուժից ինքն ու երեք երեխաները գետնին են ընկել: Մովսեսը գոռացել է, որ ձեռքը պոկվեց, եւ կինը սկսել է կանչել Միրեյին ու Արմանին՝ մտածելով, որ նրանք նույնպես ողջ են: Բեթթին նույնպես վիրավորվել է եւ չի կարողացել բարձրացնել արնաքամ դստերը:
Միրեյը մեդալներ է նվաճել Սիրիայում եւ Հայաստանում, ինչպես նաեւ Հալեպում մարզել երիտասարդ լողորդներին: Նրա մարզչի խոսքով՝ Միրեյը նպատակասլաց էր եւ մարզումները շարունակում էր նույնիսկ պատերազմը սկսվելուց հետո: «Հենց Միրեյն էր մեզ ուժ տալիս»,- ասում է նրա հայրը՝ Վիգենը:
