ՀԱՊԿ–ը պլանավորում է «Մարտական եղբայրություն» մեծամասշտաբ վարժանքներ անցկացնել։
Հայաստանի, Ղազախստանի եւ Ռուսաստանի տարածքում 2017-ի հոկտեմբերին պլանավորվում է անցկացնել ՀԱՊԿ «Մարտական եղբայրություն» վարժանքները։ Այդ մասին ՏԱՍՍ–ին հայտնել է ՀԱՊԿ Միացյալ շտաբի պետ գեներալ–գնդապետ Անատոլի Սիդորովը։
«Այս տարի ՀԱՊԿ տարբեր երկրների տարածքում տարբեր ժամանակ 4 զորավարժություն է ընթացել։ Հաջորդ տարի մենք պլանավորում ենք միավորել վարժանքները եւ դրանք անցկացնել միասնական մտահղացմամբ միաժամանակ ՀԱՊԿ հավաքական բոլոր ուժերի հետ։ Դեռեւս առաջարկվել է «Մարտական եղբայրություն» անվանմումը»,– նշել է Սիդորովը։
Նրա խոսքով՝ վարժանքները կընթանան 2017-ի հոկտեմբերին։ «Այսինքն՝ մենք դրանք չենք անցկացնի ապրիլին, օգոստոսին, սեպտեմբերին եւ հոկտեմբերին առանձին–առանձին, այլ 2017-ի հոկտեմբերին կմշակենք երեք պետությունների՝ Ռուսաստանի, Հայաստանի եւ Ղազախստանի տարածքում համատեղ գործողություններ»,– ասել է նա։
Վարժանքները մոտավորապես կտեւեն 3 շաբաթ։