Մոսկվայում խարդախության համար չորս տարվա ազատազրկման դատապարտված Լեւոն Հայրապետյանին երկու ամիս առաջ տեղափոխել են Մորդովիայի ինքնավար հանրապետության բանտ, որտեղ պայմանները շատ վատ են: Այս մասին այսօր` հոկտեմբերի 10-ին, լրագրողների հետ հանդիպմանն ասաց Հայրապետյանին սատարող խմբի անդամ, իրավապաշտպան Հայկազ Մակարյանը:
«Սարսափելի պայմաններում նստած է ինքը Մորդովիայում: Մի կերպ քայլում է, սնվում է: Նրան հակացուցված է բանտի խոնավությունը, այդ պայմանները»,- ասաց նա:
Հայկազ Մակարյանը դիմեց ՀՀ նախագահին, վարչապետին` խնդրելով հանդիպում նրանց հետ: Նրա խոսքով` Հայաստանի իշխանությունները պետք է ուշադրության կենտրոնում պահեն Լեւոն Հայրապետյանի հարցը:
«Նա երկքաղաքացիություն ունի: Երկու երկրների միջեւ պայմանագրեր կան, ըստ որոնց հնարավոր է արտահանձնում կատարել: Գոյություն ունի հիվանդության հարց, որ նրան պետք է տնային կալանքի տակ պահեն»,- ասաց նա` նշելով, որ Հայրապետյանին առանց ապացույցների առկայության են դատապարտել:
Իրավապաշտպանի կոչին միացավ նաեւ Հայրապետյանի դուստրը` 14-ամյա Զարուհին:
«Հպարտությամբ եմ քայլում այս քաղաքում, քանի որ վստահ եմ, որ հայրս հանցանք չի գործել: Երկու տասնամյակ է` հայրս իր գործերով ապացուցել է, որ Արցախն ու Հայաստանը մեկ ամբողջություն են»,-ասաց նա` նշելով, որ վերջերս խոսել է հոր հետ, նա ասել է, որ երբ ազատվի, վերդառնալու է Արցախ ու շարունակելու բարեգործություն անել:
Հիշեցնենք, որ ապրիլի 14-ին Լեւոն Հայրապետյանը դատապարտվել է չորս տարվա ազատազրկման: Հայրապետյանն առողջական լուրջ խնդիրներ ունի եւ հարազատների պնդմամբ, բանտային պայմաններն իր համար չեն:
