Եվրոպայում չեն կարող չտեսնել, որ Լեռնային Ղարաբաղի Հանրապետությունը կայացած ժողովրդավարական պետություն է, թեպետ եւ չճանաչված։ Այս մասին ասել է ԼՂՀ նախագահի մամուլի խոսնակ Դավիթ Բաբայանը՝ NEWS.am–ի թղթակցի խնդրանքով մեկնաբանելով Եվրոպայի խորհրդի գլխավոր քարտուղար Թյորբորն Յագլանդի երեկվա հայտարարությունը։ ԵԽ գլխավոր քարտուղարը հայտարարել էր, որ Եվրոպայի խորհուրդը ղարաբաղյան հակամարտության գոտուց չունի մարդու իրավունքների մասին տեղեկատվություն, ինչպես նաեւ հիշեցրել էր, որ յուրաքանչյուր մարդ ընտրության իրավունք ունի։

Դավիթ Բաբայանի խոսքով՝ վերջին ժամանակներս ակնհայտ է եվրոպացի փորձագետների, դիվանագետների եւ քաղաքական գործիչների հայտարարությունների եւ մոտեցումների վերափոխման միտումը։ «Բոլորին պարզ է. ազգերի ինքնորոշման իրավունքը անքակտելի է, այն հիմնարար իրավունք է եւ չի կարող անտեսվել»,– ընդգծել է Դավիթ Բաբայանը՝ հավելելով, որ նավթադոլարների եւ խավիարի օգնությամբ իր նպատակին հասնելու Ադրբեջանի ջանքերն ապարդյուն  են։

«Ժամանակն Ադրբեջանի օգտին չի աշխատում։ Եվրոպայում չեն կարող չտեսնել, որ Լեռնային Ղարաբաղի Հանրապետությունը կայացած ժողովրդավարական պետություն է, թեպետ եւ չճանաչված։ Վերջին միտումների վերլուծությունը ցույց է տալիս, որ ԼՂՀ ճանաչման հարցը նոր խթան է ստանում եւ դուրս է գալիս նոր փուլ»,– նշել է Դավիթ Բաբայանը։