2015 թվականի նոյեմբերին Փարիզում իրագործված ահաբեկչություններին մասնակցության մեջ մեղադրվող Սալեհ Աբդեսլամի փաստաբանները հրաժարվել են նրա պաշտպանությունից: Ֆրանսիական BFM TV-ի հետ հարցազրույցում Ֆրանկ Բերտոնն ու Սվեն Մարին հայտարարել են, որ որոշել են այլեւս չներկայացնել Աբդեսլամի շահերը:
«Վստահ ենք, որ նա չի խոսի՝ օգտվելով ցուցմունք տալուց հրաժարվելու իր իրավունքից»,- Բերտոնի խոսքերն է մեջբերում DW-ն:
Աբդեսլամը համարվում է ահաբեկչությունների մասնակիցներից միակ ողջ մնացած ծայրահեղականը, որն առանցքային դեր է ունեցել: Մինչեւ հիմա նա հրաժարվել է գործով որեւէ ցուցմունք տալ: Աբդեսլամին ձերբակալել են Բրյուսելում, 2016 թվականի մարտի 18-ին, եւ հանձնել Ֆրանսիայի իշխանություններին: Իսլամականին մեղադրում են սպանության, սպանության փորձի, ազատությունից զրկելու, ինչպես նաեւ պայթուցիկ նյութեր պահելու մեջ:
2015 թվականի նոյեմբերի 13-ին Փարիզում իրականացված ահաբեկչությունների հետեւանքով 130 մարդ զոհվեց, եւս 350-ը՝ վիրավորվեց: Հանցագործությանն իր մասնակցության մասին հայտարարեց «Իսլամական պետություն» ահաբեկչական խմբավորումը: