Եվրոպայի խորհրդի խորհրդարանական վեհաժողովի լիագումար նիստում այսօր՝ հոկտեմբերի 12-ին, պատգամավորները խստորեն քննադատեցին Թուրքիայի իշխանությունների գործողությունները:

NEWS.am-ի հատուկ թղթակիցը Ստրասբուրգից հաղորդում է, որ մինչեւ պատգամավորների հարցերին պատասխանելը Թուրքիայի արտաքին գործերի նախարար Մեւլութ Չավուշօղլուն հայտարարեց, թե Թուրքիան ժողովրդավարական երկիր է եւ պահպանում է Եվրոպական կոնվենցիայի բոլոր նորմերն ու դրույթները: Այս հայտարարությունը զարմացրեց եւ զայրացրեց ներկա պատգամավորներին: Շատերն իրենց խոսքում շեշտում էին՝ ինչպես կարող է Թուրքիան ժողովրդավարական երկիր համարվել, եթե պետական հեղաշրջման փորձի տապալումից հետո իշխանությունները ճնշումներ են գործադրում մարդկանց նկատմամբ, կալանավորում, պահում անմարդկային պայմաններում:

«Չեք հասկանո՞ւմ, որ դարձել եք մերձավորարեւելյան երկիր, ժողովրդավարական վիճակը ձեր երկրում պայթյունավտանգ է»,- Չավուշօղլուին դիմեց դանիացի պատգամավոր Միքայել Յենսենը, ապա հիշեցրեց, թե քանի լրագրող ու քաղաքացիական ակտիվիստ է գտնվում բանտերում:

Թուրքիայի արտգործնախարարը, չնայած քննադատություններից, կրկին վստահեցրեց, որ ժողովրդավարական երկիր է Թուրքիան: Անդրադառնալով լրագրողների կալանավորման փաստին՝ նա նշեց, թե այդ անձինք չեն կալանավորվել լրագրող լինելու համար:

Նշենք, որ Չավուշօղլուին հարցեր տալու համար շատ պատգամավորներ էին հերթագրվել, սակայն ժամանակը չբավականացրեց:

Հիշեցնենք, որ 2016թ. հուլիսի 16-ի գիշերը Թուրքիայում մի խումբ խռովարարներ ռազմական հեղաշրջման փորձ են կատարել: Հիմնական իրադարձությունները ծավալվել են Անկարայում եւ Ստամբուլում: 246 քաղաքացի է զոհվել՝ չհաշված խռովարարների շրջանում զոհերը, ավելի քան 2 հազար վիրավոր կա:

Թուրքիայի իշխանությունները հեղաշրջման փորձը կազմակերպելու մեջ մեղադրում են իսլամական քարոզիչ Ֆեթուլլահ Գյուլենին եւ ԱՄՆ-ից պահանջում արտահանձնել նրան: Գյուլենն ինքը դատապարտել է խռովությունն ու հայտարարել, որ կապ չունի դրա հետ:

Թուրքիայում հեղաշրջման փորձից հետո ավելի քան 40 հազար մարդ է ձերբակալվել, 20 հազարը՝ կալանավորվել, 79 հազար մարդ պաշտոնանկ է արվել:

Աիդա Հովհաննիսյան, Ստրասբուրգ