Եվրոպայի խորհրդի խորհրդարանական վեհաժողովի հոկտեմբերի 13-ի լիագումար նիստում քննարկվում է Թուրքիայում պետական հեղաշրջման փորձից հետո ստեղծված իրավիճակը:
NEWS.am-ի հատուկ թղթակիցը Ստրասբուրգից հաղորդում է, որ եվրոպացի պատգամավորները ընդգծեցին՝ Թուրքիան չի կարող ժողովրդավարական երկիր լինել, եթե դրա համար չեն աշխատում, այնուհետեւ հորդորեցին տեր կանգնել օրենքի ուժին, ժողովրդավարությանն ու կառավարման համակարգին:
«Շատ լավ է, որ մենք այստեղ հավաքվել ենք՝ քննարկելու Թուրքիայում հուլիսի 16-ից հետո ստեղծված իրավիճակը: Որպես քաղաքական գործիչներ՝ մեր նպատակը պետք է լինի բացառել ճնշումները: Թուրք գործընկերներ, հրաշալի է, որ այստեղ եք, սակայն մի մոռացեք, քաղաքական գործիչները պետք է ամեն ինչ անեն՝ բացառելու ճնշումները»,- ասաց ֆրանսիացի պատգամավոր Ժան- Կլոդ Մինյոնը:
Ելույթ ունեցող պատգամավորներին մտահոգում էր նաեւ փաստը, որը հեղաշրջման փորձից ընդամենը ժամեր անց սկսեցին քաղաքացիների ձերբակալել՝ կասկածելով գյուլենական գաղափարախոսություն ունենալու համար: Բանախոսները զարմացած են՝ ինչպես կարողացան այդքան կարճ ժամանակահատվածում հասկանալ, թե ով է պատասխանատու կատարվածի համար:
«Ճիշտ չէ, երբ լրատվամիջոցներ են փակվում, դատավորներ են կալանավորվում, փողոցներում քայլող քաղաքացիների են բերման են ենթարկում, որովհետեւ դեմ են իշխանություններին: Սա ճիշտ չէ, չի կարելի նման բան թույլ տալ: Չավուշօղլուն նախօրեին խոսեց մահապատժի մասին, սակայն չի կարելի նման բան թույլ տալ»,- ասաց դանիացի Միքայել Յենսենը:
Թուրքիայում ժողովրդավարության բացակայության եւ ճնշումների մասին առավել մանրամասն խոսեց քրդական «Ժողովուրդների դեմոկրատական» կուսակցության ներկայացուցիչ Հիսյար Օզսոյը: Նա ներկաներին հայտնեց, որ հուլիսի 16-ից հետո Թուրքիայի իշխանությունները փակել են քրդական հեռուստաընկերությունները, նույնիսկ մանկական եւ երաժշտական, առանց պատճառաբանության՝ կալանավորել են հազարավոր մարդկանց, բռնություն են գործադրում քաղաքացիների նկատմամբ:
«Թուրքիայի իշխանությունները պետական հեղաշրջման փորձի անվան տակ տեռորի են ենթարկում մարդկանց»,- հայտարարեց Թուրքիայի պատգամավորը:
Հիշեցնենք, որ 2016թ. հուլիսի 16-ի գիշերը Թուրքիայում մի խումբ խռովարարներ ռազմական հեղաշրջման փորձ են կատարել: Հիմնական իրադարձությունները ծավալվել են Անկարայում եւ Ստամբուլում: 246 քաղաքացի է զոհվել՝ չհաշված խռովարարների շրջանում զոհերը, ավելի քան 2 հազար վիրավոր կա:
Թուրքիայի իշխանությունները հեղաշրջման փորձը կազմակերպելու մեջ մեղադրում են իսլամական քարոզիչ Ֆեթուլլահ Գյուլենին եւ ԱՄՆ-ից պահանջում արտահանձնել նրան: Գյուլենն ինքը դատապարտել է խռովությունն ու հայտարարել, որ կապ չունի դրա հետ:
Թուրքիայում հեղաշրջման փորձից հետո ավելի քան 40 հազար մարդ է ձերբակալվել, 20 հազարը՝ կալանավորվել, 79 հազար մարդ պաշտոնանկ է արվել:
Աիդա Հովհաննիսյան, Ստրասբուրգ
