Մոսկվան առանձնապես լավատեսություն հիմքեր չունի մոտ ժամանակներս ղարաբաղյան հակամարտության կարգավորման կապակցությամբ եւ կշարունակի Երեւանի եւ Բաքվի հետ աշխատանքը։ Այս մասին ասել է ՌԴ նախագահի օգնական Յուրի Ուշակովը, փոխանցում է «ՌԻԱ Նովոստի»–ն։
«Ես չէի ասի, որ մենք շատ լավատես ենք մոտ ժամանակներս այդ հակամարտության կարգավորման հարցում։ Բայց կշարունակենք համառորեն աշխատել Բաքվի եւ Երեւանի հետ»,– ասել է Ուշակովը լրագրողներին։
Ընդ որում, նախագահի օգնականը հրաժարվել է բացահայտել բանակցությունների ներքին խոհանոցը՝ ասելով, որ քննարկվում են շատ տարբերակներ եւ առաջարկներ։ «Բայց կրկնում եմ, դեռեւս հիմքեր չկան առանձնակի լավատեսության համար»,– ասել է նա։
Ընդ որում, Հայաստանին Ռուսաստանի կողմից զենքի մատակարարումների պատճառների մասին հարցին ի պատասխան՝ Ուշակովն ասել է, որ Ռուսաստանը Հայաստանի դաշնակիցն է եւ իրավունք ունի մատակարարել այն սպառազինությունները, որոնց մասին պայմանավորվել է գործընկերների հետ։ «Այստեղ ոչ մի անսպասելի բան չկա ոչ մեկի համար, ըստ իս, նաեւ ադրբեջանցի գործընկերների համար։ Ադրբեջանին, ինչպես գիտեք, մենք նույնպես զենք ենք մատակարարում»,– ասել է նա։