Ղարաբաղա-ադրբեջանական հակամարտության կարգավորման գործընթացն ինքը կարգավորման կարիք ունի: Հենց դրան է ուղղված Ռուսաստանի արտգործնախարար Սերգեյ Լավրովի հայտարարությունը: Այս մասին NEWS.am –ի հետ զրույցում ասել է ԼՂՀ նախագահի մամուլի խոսնակ Դավիթ Բաբայանը՝ մեկնաբանելով ղարաբաղյան հակամարտության կարգավորման գործում Թուրքիայի ունեցած հնարավոր դերակատարման մասին Լավրովի հայտարարությունը:
«Մենք միշտ ասել ենք, որ Թուրքիան չի կարող միջնորդ դառնալ հակամարտության կարգավորման գործում, քանի որ այդ երկիրը կողմնակալ վերաբերմունք ունի, ավելին՝ ակնհայտ ադրբեջանամետ եւ հակահայկական դիրքորոշում ունի»,- հիշեցրել է Դավիթ Բաբայանը:
ԼՂՀ նախագահի մամուլի խոսնակի գնահատմամբ՝ Սերգեյ Լավրովի հայտարարությունը շատ կարեւոր է, այն նշագծում է Թուրքիայի մասնակցության հնարավորությունները: Այսինքն՝ Թուրքիային հասկացնել են տվել, որ նա չի կարող միջնորդ լինել, սակայն եթե իրոք շահագրգռված է տարածաշրջանում խաղաղության եւ կայունության հարցում, թող գործով, այլ ոչ թե բառերով քայլեր կատարի եւ բացի սահմանը:
Դավիթ Բաբայանի խոսքով՝ Հայաստանի եւ ԼՂՀ-ի հետ սահմանի բացմանը հաջորդող քայլը պետք է լինի բանակցությունների լիամասշտաբ վերականգնման ե ԼՂՀ-ին բանակցային սեղանի շուրջ վերադարձնելու հարցը:
«Եթե Թուրքիան ինքը բացի Հայաստանի հետ սահմանը եւ ազդի Ադրբեջանի վրա ԼՂՀ սահմանների բացման հարցում, ապա դա հիանալի օրինակ կլինի»,- ասել է Դավիթ Բաբայանը՝ հավելելով, որ, սակայն, 100 տոկոս վստահությամբ կարելի է ակնկալել, որ դա տեղի չի ունենա: Մասնավորապես դա է վկայում Թուրքիայի վերջին հայտարարությունը:
