Անկարան դրական է գնահատում ՌԴ արտգործնախարար Սերգեյ Լավրովի հայտարարությունը ղարաբաղյան հակամարտության կարգավորման գործում Թուրքիայի դրական դեր ունենալու հնարավորության մասին: Այս մասին Trend-ին հայտնել են Թուրքիայի ԱԳՆ-ից:
Հաղորդագրության մեջ նշվում է, որ Թուրքիան առաջին հերթին Հարավային Կովկասի տարածաշրջանին խաղաղություն եւ կայունություն է մաղթում:
Ընդ որում, Թուրքիայի ԱԳՆ-ից չեն հապաղել հայտարարել, որ «տարածաշրջանի բոլոր երկրների տարածքային ամբողջականության եւ ինքնիշխանության պահպանումը կնպաստի տարածշրջանում շարունակական խաղաղությանն ու կայունությանը»: Թուրքիայի ԱԳՆ-ից նշել են, թե «Հայաստանը ապակառուցողական դեր է խաղում ղարաբաղյան հակամարտության մեջ, ինչը ռիսկեր է ստեղծում տարածաշրջանում խաղաղության եւ կայունության համար»:
Գործակալության զրուցակիցը նշել է, որ Թուրքիան պաշտպանում է Ադրբեջանին այդ հարցում եւ կողմ է այդ խնդիրը Ադրբեջանի տարածքային ամբողջականության եւ ինքնիշխանության շրջանակներում լուծելուն:
«Թուրքիան, անկասկած, կպաշտպանի Ադրբեջանի դիրքորոշումը այդ հարցում: Այս կապակցությամբ Թուրքիան՝ որպես ԵԱՀԿ ՄԽ անդամ, ուշադիր հետեւում է կարգավորման գործընթացին եւ փորձում է նպաստել բանակցությունների առաջընթացին Ադրբեջանի հետ սերտ հարաբերությունների միջոցով»,- հայտնել են ԱԳՆ-ից:
Հիշեցնենք, որ նախօրեին ՌԴ արտգործնախարար Սերգեյ Լավրովը հայտարարել էր, որ Թուրքիայի դրական դերը կարող է լինել Հայաստանի հետ սահմանի բացումը:
