Բեսլանում հայկական ավտոբուսի վթարից տուժածների վիճակը մնում է անփոփոխ։
Հոկտեմբերի 17-ին, ժամը 17.45-ին Հայաստանի արտակարգ իրավիճակների ճգնաժամային կառավարման ազգային կենտրոնից կապ է հաստատվել Բեսլան քաղաքի «Հյուսիս-կովկասյան բազմապրոֆիլ բժշկական կենտրոն»-ի՝ ՀՀ քաղաքացիներին բուժող բժշկի հետ, որը տեղեկացրել է, որ տուժածների՝ Հարությունյան Ժ. Մ.-ի (1949 թ. ծնված) եւ Պողոսյան Ս. Ս.-ի (1990 թ. ծնված) առողջական վիճակը մնում է անփոփոխ՝ կայուն ծանր:
Ժամը 17.30-ի սահմաններում նշված ԲԿ է տեղափոխվել Բաղդասարյան Հ.-ը, ով մինչ այդ բուժվում էր Վլադիկավկազի կլինիկական հիվանդանոցում: Ծատինյան Ա. Ն.-ը (1984 թ. ծնված)՝ շարունակվում է բուժվել Վլադիկավկազի կլինիկական հիվանդանոցում: Վերջինիս վիճակը գնահատվում է միջին ծանրության:
Հիշեցնենք, որ հոկտեմբերի 14-ին, տեղական ժամանակով՝ 05.30-ին Վլադիկավկազ-Բեսլան շրջանցիկ ավտոճանապարհի 8-րդ կմ-ին «Մերսեդես Բենց-0404-15R» մակնիշի 50 AA 515 պետհամարանիշի մարդատար ավտոբուսը Մոսկվա-Երեւան երթուղին իրականացնելիս բախվել է «Սկանիա» մակնիշի բեռնատար ավտոմեքենային: Պատահարի հետեւանքով զոհվել են 5 մարդ, վիրավորվել՝ 27 ուղեւոր: