Վարչական դատարանն այսօր՝ հոկտեմբերի 18-ին, մերժել է Գյումրիի ավագանու 4 թեկնածուների հայցը («Բարգավաճ Հայաստան» եւ «Հայկական վերածնունդ» կուսակցություններից), որոնք վիճարկում էին Գյումրիի քաղաքային ընտրություններից հետո մանդատների բաշխման վերաբերյալ թիվ 34 ընտրատարածքային ընտրական հանձնաժողովի կայացրած որոշումը։
Բանն այն է, որ ըստ ԸԸՀ որոշման, ԲՀԿ- եւ «Հայկական վերածնունդ» կուսակցություններից մեկական մանդատ բոնուսային մեխանիզմի կիրառման արդյունքում փոխանցվել է «Բալասանյան» դաշինքին, որւի մանդատների թիվը 15-ից դարձել է 17, ինչը թույլ է տվել «Բալասանյան» դաշինքին մեծամասնություն կազմել ավագանիում:
Հայցվոր կուսակցությունների համար անհասկանալի է, թե ինչու է հենց ԲՀԿ-ից ու ՀՎԿ-ից վերցվել մեկական մանդատ ու տրվել «Բալասանյան» դաշինքին։ Այդ ուժերը համարում են, որ իրենց մանդատները պարզապես գողացել են:
Նշենք, որ եթե չլիներ բոնուսային մեխանիզմը, «Բալասանյան» դաշինքը կունենար 15 մանդատ, ԲՀԿ-ն՝ 9 մանդատ, «Հայկական վերածնունդը»՝ 5 մանդատ եւ ԳԱԼԱ-ն՝ 4 մանդատ:
Ավելի վաղ NEWS.am-ը հայտնել էր, որ ԲՀԿ-ն, «Հայկական վերածնունդ»-ն ու ԳԱԼԱ-ն բոյկոտել են Գյումրիի ավագանու նիստը: Նրանք հայտարարել են, որ կշարունակեն բոյկոտը, մինչեւ իրավական ոլորտում խնդրի լուծումը: