Նյու Յորքի ոստիկանության աշխատակիցը գնդակահարել է մահակով զինված մերկ կնոջը՝ Բրոնքսի իր բնակարանում: Այս մասին հայտնում է New York Post-ը:
Ոստիկանները ժամանել են 66-ամյա Դեբորա Դեների տուն՝ բղավոցներ լսած նրա հարեւանների ահազանգով: Երբ իրավապահները մտել են կնոջ բնակարան, նա նրանց մկրատով է սպառնացել: Նրանք համոզել են կնոջը ցած գցել մկրատը, սակայն Դեները վերցրել է մահակը եւ փորձել է գրոհել ոստիկաններից մեկի վրա, որը երկու անգամ կրակել է նրա վրա:
Դեներին հիվանդանոց են տեղափոխել, որտեղ նա մահացել է: Հաղորդվում է, որ կինը հոգեկան խանգարում ուներ: Ոստիկանությունը պարզում է, թե ինչու է ոստիկանը հրազեն կիրառել՝ իր մոտ եղած էլեկտրաշոկերի փոխարեն:
Միջադեպը արագ արձագանք է գտել հանրության շրջանում, որը վրդովված է տեղի ունենցածից եւ արագ հետաքննության կոչ է անում: Նյու Յորքի քաղաքապետ Բիլ դե Բլազիոն իր Twitter-ում գրել է «տեղի ունեցածը մանրակրկիտ պարզաբանելու» մտադրության մասին: